ලිංගික අධ්යාපනය පාසල් විෂය නිර්දේශයට හඳුන්වා දෙන්නට යනවා ය කියා හාහූවක් සමාජ ජාලවල ඇවිළෙනවා. පාසල්වල ලිංගික හා ප්රජනන සෞඛ්ය අධ්යාපනය විධිමත් කිරීමේ පියවර නම් දැන් ක්රියාත්මක වෙමින් තිබෙනවා. ලිංගික හා ප්රජනන සෞඛ්ය අධ්යාපනය කියන්නේ ලිංගික අධ්යාපනය නෙමෙයි.
මේ අත්යවශ්ය අධ්යාපනය විධිමත් කිරීම පහසු කාර්යයක් නො වන බවට උදාහරණයක් ලෙස 2010 වසරේදී සිදු වූ සිද්ධියක් දැක්විය හැකි ය. විදේශ දරුවන් ද අධ්යාපනය ලබන ප්රධාන පෙළේ පෞද්ගලික පාසලක් වූ කොළඹ ජාත්යන්තර පාසල විසින් වයස අවුරුදු 11 – 12 අතර සිසුන්ට ජාත්යන්තර වශයෙන් භාවිතා වන පෙළ පොතක් වන ජෝ ජෙන්කින්ස්ගේ Moral Issues හඳුන්වා දීමත් සමග දේශීය දෙමව්පියන්ගෙන් බරපතල විරෝධයක් මතු විය.
වයස අවුරුදු 10 – 19 අතර වයස් කාණ්ඩයේ ළමයින්ට නිසි ලිංගික හා ප්රජනන සෞඛ්ය අධ්යාපනයක් නො ලැබෙන්නේ ද යන ගැටලුව කෙරෙහි අවධානය යොමු කරමින් 2015 වසරේදී රජයේ පාසල්වල පෙළ පොත් අන්තර්ගතය අධ්යයනය කළ අපට දක්නට ලැබුණේ ලිංගික අධ්යාපනය හා සම්බන්ධ විද්යාත්මක හා සමාජමය කරුණු රාශියක් එම පොත්වල සාකච්ඡා කරන බවයි. (මෙම අධ්යයනයට අදාළ වුණේ 2015 වන විට භාවිතයේ පැවති පෙළ පොත් ය.)
ඒ වන විට රජයේ පාසල්වල භාවිතයේ පැවති පෙළ පොත් ලිංගික අධ්යාපනය වෙනුවෙන් ලබා දී තිබෙන ඉඩකඩ පිළිබඳ අපගේ අධ්යයනයෙන් සොයා ගත් තොරතුරු මෙසේ ය:
මිනිසාගේ ප්රජනක පද්ධතිය පිළිබඳ මුල් වරට විධිමත් හඳුන්වා දීමක් දරුවාට කරන්නේ 7 ශ්රේණියේ විද්යාව පෙළ පොතෙහි ය.
7 ශ්රේණියේ සෞඛ්යය හා ශාරීරික අධ්යාපනය පෙළ පොතෙහි 'සෞඛ්යයට අදාළ අභියෝග ජය ගනිමු' යන පාඩමෙහි ඒඩ්ස් රෝගය ගැන අධ්යාපනයක් දරුවාට ලබා දෙන ලදී. එහි ම 'යෞවනයට අත්වැලක්' යන පාඩමෙන් දරුවා ලිංගික අධ්යාපනයකට සූදානම් කිරීමක් සිදු විය.
ළමයින් නව යොවුන් වියට එළඹෙමින් සිටින 8 ශ්රේණියේ සෞඛ්යය හා ශාරීරික අධ්යාපනය පෙළ පොතෙහි ලිංගික අධ්යාපනය ස්පර්ශ වී යන ‘යෞවන අවශ්යතා' යන පාඩමක් තිබේ.
9 ශ්රේණිය සෞඛ්යය හා ශාරීරික අධ්යාපනය පෙළ පොතෙහි 'පුමිතිරි බවෙහි අභිමානය සුරකිමු' මැයෙන් අගනා ලිංගික අධ්යාපනික පාඩමක් අඩංගු වේ. එහි ලිංගික අනන්යතාව, ලිංගිකත්වය යහපත් අන්දමින් යොදා ගත හැකි ආකාරය, එය අයහපත් අන්දමින් යොදා ගැනීමේ ආදීනව, වගකීම් සහගත ලිංගික චර්යා, ස්ත්රී – පුරුෂ සමාජභාවය, ගැබිණි අවස්ථාවේදී පුරුෂයාගේ කාර්යභාරය, ළමා සංවර්ධනයේදී පුරුෂයාගේ දායකත්වය වැනි කරුණු සාකච්ඡා කෙරේ. 'සමාජයීය අභියෝගවලට සාර්ථක ව මුහුණ දෙමු' යන පාඩමෙහි යෞවනෝදය, අපචාර, ඒඩ්ස් වැනි කරුණු කාලීනව සාකච්ඡා කෙරේ.
10 ශ්රේණියේ විද්යාව පෙළ පොතෙහි 8 පාඩමෙහි 'ජීවීන්ගේ ලාක්ෂණික සහ ප්රජනනය' පිළිබඳ කෙටි විස්තරයක් දැක්වේ.
10 ශ්රේණියේ විද්යාව පෙළ පොතෙහි 'ජීවයේ අඛණ්ඩතාව' පාඩමෙහි යොවුනුදාව, ද්විතීයක ලිංගික ලක්ෂණ, ස්ත්රී හා පුරුෂ ප්රජනක පද්ධති, ආර්තව චක්රය, සංසේචනය, කළලයේ වර්ධනය, ලිංගිකව සම්ප්රේෂණය වන රෝග ආදී ලිංගික අධ්යාපනය හා සම්බන්ධ විද්යාත්මක කරුණු රැසක් සාකච්ඡා කෙරේ.
ඊට අමතරව, ප්රවේණිය හා සම්බන්ධ වූ 20වන පාඩමෙහි මිනිසාගේ ලිංග නිර්ණය, මානව ප්රවේණික ආබාධ යන ජාන විද්යාත්මක කාරණා සාකච්ඡා කරනු ලැබේ.
10 ශ්රේණිය සෞඛ්යය හා ශාරීරික අධ්යාපනය විෂය නිර්දේශය යටතේ 'ළමා වියේ සංවර්ධනය පිළිබඳ දැනුම්වත් වෙමු' යන 1 පාඩමෙහි වයස අවුරු 10 දක්වා ළමා විය පිළිබඳව ද, මවක වීමට පෙර දැන ගත යුතු කරුණු, පූර්ව ප්රසව අවධිය යන ලිංගික අධ්යාපනය හා සම්බන්ධ කරුණු ද කෙටියෙන් සාකච්ඡා වේ. එම පෙළ පොතෙහි ම 'ජීවිතයේ මුහුණ දීමට සිදු වන අභියෝග ජය ගනිමු' යන 10 පාඩමෙහිදී යෞවනෝදයේ ගැටලු පිළිබඳ සාකච්ඡා කිරීමට අවස්ථාවක් ලබා ගෙන නැත. එහෙත්, එහි ලිංගික අතවර හා අපයෝජන පිළිබඳ සාකච්ඡා කෙරේ.
එහි 'සිරුරේ නීරෝගී බව රැක ගනිමු' යන 08වන පාඩමෙහි ප්රනක පද්ධතිය පිළිබඳ අගනා පාඩමක් ඇතුළත් වේ. එහි ආර්තව චක්ර හා ස්ත්රී ප්රජනක හෝමෝන, පුරුෂ ප්රජනක පද්ධතිය, ලිංගික පද්ධතිය ආශ්රිත රෝග, ප්රජනක පද්ධතිය ආශ්රිත රෝග වළක්වා ගැනීමට කළ හැකි දේ ඇතුලු වැදගත් කාරණා රැසක් සාකච්ඡා කෙරේ.
10 ශ්රේණිය ගෘහ ආර්ථික විද්යාව පෙළ පොතෙහි 'යෞවන වියේ දී මුහුණ පෑමට සිදුවන වෙනස්වීම්වලට අනුවර්තනය වීම සඳහා සහාය වෙයි' යන පාඩමෙහි ද ලිංගික අධ්යාපනය හා අදාළ වන කරුණු සාකච්ඡා කෙරේ.
11 ශ්රේණියේ විද්යාව පෙළ පොතෙහි ජීව විද්යාව 2වන පාඩම සම්පූර්ණයෙන් ම වෙන් වන්නේ ප්රජනනය පිළිබඳ සාකච්ඡා කිරීමටයි. 'ජීවීන්ගේ දේහ කෘත්ය කෙරෙහි බලපාන යාන්ත්රණ' හා 'ප්රවේණිය හා පරිණාමය' යන පාඩම්වල ද ලිංගික අධ්යාපනය හා සම්බන්ධ කාරණා සඳහන් වේ.
11 ශ්රේණිය සෞඛ්යය හා ශාරීරික අධ්යාපනය පෙළ පොතෙහි ලිංගික අධ්යාපනයට වැදගත් වන්නා වූ පාඩම් කීපයක් ම තිබේ. ඒවා නම්,
- ළමා වියෙන් වැඩිහිටි වියට
- යොවුන් වියේ වෙනස්වීම්වලට සාර්ථකව මුහුණ දෙමු
උසස් පෙළ විෂයමාලාවන්හි ජීව විද්යාව විෂය නිර්දේශයේ හැර වෙනත් විෂයක ලිංගික අධ්යාපනයට ඍජුව අදාළ වන කරුණු සාකච්ඡා කෙරෙන්නේ නැත.
කෙසේ වෙතත්, ක්රියාත්මක විෂය නිර්දේශානුකූලව පාසලේ 11වන ශ්රේණිය වන විට සිසුන් ලිංගික අධ්යාපනය හා සමිබන්ධ සැලකිය යුතු දැනුමක් ලබා ගත යුතුව තිබේ. එසේ නො වන්නේ නම් කොතැනක හෝ ගැටලුවක් තිබිය යුතු ය. එය කුමක් ද යන්න සොයා බැලිය යුතු ය.
වර්තමානයේ භාවිතා වන පෙළ පොත් සම්බන්ධයෙන් මෙවැනි අධ්යයනයක් කළ යුතුව තිබේ.